День в Кривій

   Крива то село на Лемківщыні (Горлицкій повіт), в котрім перед ІІ Світовом війном мешкало 205 нашых люди и 5 жыдів (поляків в цілій парафіі – Крива, Воловец, Ясюнка, Баниця – было лем 8, даны за Шематизмом ААЛ з 1936 р.). По выселіню не остав з них нихто. До Кривой спровадили ся польскы осадникы котры нашли затрудніня в створеным през владу пеґеери. Коли в 1989 р. впав соціялістичний систем, розвязано тот єдиний в Кривій заклад праці и більшіст люди остала без роботы. Не горнули ся до самодільного ґаздуваня, чекали лем на «куронівкы» и іншы соціяльны запомогы. Не дуже нашых люди вернуло до Кривой, але тоты што вернули довели, же то они сут в себе. Вказали, же на тій нашій бідній и тяжкій до обробліня земли знают ґаздувати и з того, што ім іх рідна земля вродит, выжыти. Гнеска сут ту єдиныма ґаздами.

   Так выглядат скорочена історія и гнешній стан річы в Кривій, селі в котрім 29 мая того рока мав місце фестин. То юж вправді дост давно тому, але до гнеска ся мі памятат и хотів бым ся з Вами поділити своіма передуманями и рефлексіями. То перша така імпреза в Кривій, зато барз быв єм цікавий, як буде то выглядало. Погода ся не удала: дойдж, гмла и студін не заохотили до приізду до Кривой. Поза місцевыма была там дослівно жменя люди, вшыткого коло соткы, може кус веце. На сцені не діялося нич цікавого. Видавало бы ся, же неє што довше оставати, же треба вертати домів, але о 19 годині зачав ся выступ «Серенчы». З початку польска публика (нашых люди можна было порахувати на пальцях єдной рукы) была здивлена: Po jakiemu oni spiewaja? Przecieї nie po polsku!. Але юж по першій співанці вшыткы зімали ритм, зачали ся бавити а некотры прібували гуляти. Пізнійше навчыли ся навет рефрену «Гея гой, лелия, любуваня то велика пасия» и співали разом зо «Серенчом». Лемківска музыка ожывила публику, принесла тым што єй почули серенчу, одже щесця.

   Майме надію же все найдут ся такы або іншы оказії до припоминаня о тотожности той землі там, де гнеска (так як в Кривій) нашых люди єст барз мало або взагалі іх неє. 

Ден в Кривій зорганізувало 29 травня Стоваришиня розвитку шолтиства Крива, котрого головом є Моніка Шнайдерман, власник відомого видавництва “Чарне” з Волівця.

Михал Вірхнянскій

Фото автора

Наше слово nr 35, 29 серпня 2004 року